Wis dadi mupakaté Wong Tegal, ngadegé kota Tegal tanggal rolas April séwu limangatus wolung puluh (1580). Pedhaminane sing wis dimupakati kuwé ditetepna nang Peraturan Daerah Nomer Lima Taun Séwu Sangangatus Wolung Puluh Wolu.
Ngadegé Kota Tegal kiyé, ora liya kasebab srawungané lan rintisané Ki Gedé Sebayu. Ki Gedé Sebayu ora petungan kanggone ngadekna Kota Tegal sing gemiyén ésih desa, arané desa Tetegal. Sing dipikirna Ki Gedé Sebayu pribén carané makmurna wargané.
Usahané Ki Gedé Sebayu ora sia sia. Selek suwé Desa Tetegal tambah moncér. Wong-wong pada gumun , apa sing dilakoni Ki Gedé Sebayu bener-bener netes,
warga ora kapiran, saben dina ngrasakna ayem mangan cukup, sandang cukup, paribasané ora tau kurang pangan. Ki Gedé Sebayu disubya –subya warga. Wong-wong pada ngintili Sebayu.
Sebayu ngétan ya melu ngétan, ngulon yang melu ngulon, apa sing dikarepna Sebayu, dilakoni. Suwé-suwé aran Sebayu tambah moncér, saking moncéré, Bupati Pemalang akhiré ngangkat Sebayu dadi juru Demung atawa Demang.
TEGAL GEMIYÉN
Awit gemiyén, ya kira kira abad sepuluh (X), Tegal wis ana wongé, malah akéh sing wis kenal Tegal. Wong-wong Hindu sing India, toli wong Cina wis pada dagang nang Tegal.
Tegal kuwé gemiyén dusun, selek suwé selek ramé toli waktu taun limang atusan,
wis kondang arané nang negara sabrang. Tome Pieres, wong sekolahan sing pinter karo sisan dagang, lagi nglilingi jagad, tau mampir nang tlatah Jawa, salah sijiné maring Tegal. Tegal wayah samana wis ana bandharan lauté atawa pelabuhan, dasaré wong Portugis, Tome Pieres ngarani desa Tetegal, muniné Teteguall, ya wong ilaté bisané ngomongé kaya kuwè.
Tegal taun sewu limangatus ( Th 1.500) , sing ngenggoni kurang luwih ana patang ewu wong. Akéhé pada manggoni nang panggonan sing ramé, luruh panganne dadi tani, liane pada bakulan.
NGADEGÉ KOTA TEGAL
Kota Tegal, manglihan sing desa Teteguall, taun séwu limangatus telung puluh (1530) wis mulai katon jongkoté, malah katon luwih moncér ketimbang Pemalang, ning cetané, Tegal wektu kuwé melu wilayahé Kabupaten Pemalang sing ngakoni Kerajaan Pajang. Pemalang wayah semana Bupatiné Radén Benowo, anaké JakaTingkir.
Wayah semana Pajang oreg, Ki Gedé Sebayu sing ésih brayahé Radén Benowo, nglius nglungani, yagyagan mlebu alas, manjat gunung, arahé ngulon,
anjog nang pinggiré kali Gung. Weruh tegalan sing katon subur, Sebayu njenggirat kagét. Weruh bulakan amba sing ora mupakat ambané lan kosong mlopong, mandek nglegleg,
éram ora karuan. Niat ingsuné ngragati tegalan sing akéh alang-alengé didadékna sawah. Bareng-bareng karo warga asli Tegal mbabati alang-alang rungseb sing pating crongat diratakna dadi sawah.
Tegal ora ujug-ujug dadi ombèr atawa makmur,
ombèré Tegal ora liya merga kiprahé Ki Gedé Sebayu. Ki Gedé Sebayu ora tau lirén mikiri wargané. Pribén carané ngombérna rayat Tegal, ajibé maning, ora mung ngajari tani karo luruh penguripan, Sebayu uga ngajari ngaji, éndah imam Islamé warga tambah mantep.
Wayah Ki Gedé Sebayu diunggahna dadi sesepuh desa, dirayakna sawisé warga pada panén pari, sing ora duwé sawah melu derep liyané ana sing panén palawija. Wektu samana tanggal limalas (15) Sapar tahun EHE sangangatus wolungpuluh wolu (988), malem Jumat Kliwon.
Dina, tanggal karo tauné Ki Gedé Sebayu diunggahna dadi Juru Demung, ditetepna dadi tetenger ngadegé Kota Tegal. Tetenger mau ditetepna nang Peraturan Daerah nomer lima Tahun sewu sangangatus wolungpuluh wolu (Th 1988), tanggal wolulikur Juli séwu sangangatus wolungpuluh wolu (28 Juli 1988). Nang Peraturan Daerah mau, dina ngadegé Kota Tegal diwujudna nganggo Candra Sengkala karo Surya Sengkala :
Taun EHE sangangatus wolungpuluh wolu Hijriah, Candra Sengkalane MANGÉSTI BASUKINING ANGGO, sing maksudé:
Mangésti artiné wolu
Basuki artiné wolu
Anggo artiné sanga
Ndonga nggo keselametan awaké dewék, maksudé : Kabéh wong sing urip ora tau mandeg ndonga maring Gusti Allah. Nggo keselametan awaké dewék, dunya lan akhérat
2. Taun sewu limangatus wolungpuluh masehi, Surya Sengkala né
PURNANING PANGÉSTI WISIKING GUSTI, sing maksudé
Purna artiné 0
Pangésti artiné 8
Wisik artiné 5
Gusti artiné 1
Sawisé ndonga, olih paweruh sing Gusti Allah, kabéh wong kudu yakin, angger njaluk marang Gusti Allah sing khusuk tuma’ninah, pan olih paweruh sing Gusti Allah.
Sawah nang Tegal seleg suwé seleg jembar,
banyuné ngamplak-ngamplak ora tau kurang, toli tata. Tata sawahé tata banyune sampé diarani tata tirta. Hasile tanén ngamplak-amplak, akéhé ora jamak. Saking akéhé , pariné ora mung nggo mangan déwék, ana sing dokon lumbung ana sing didol maring desa liyané.
Pentolé maning, hasil tanén mau dikumpulna ora pating tlékték. Wong liya desa sing meruh pari sekandang mbentang, pada tuku. Akhiré panggonan sing mau nggo ngumpulna hasil panén, dadi pasar.
Raméné pasar mau, dadi akéh wong sing sering ngumpul, ana sing tuku ana sing adol, ana sing ileng-ileng thok. Éndah ora kadohen tuku karo nggelar dagangan, wong-wong pada nggawé umah nang pereké pasar. Suwé-suwé dadi kampung sing ramé. Kampung mau tambah ramé, tambah amba tambah akéh wongé.
Muara kali Gung sing dadi pelabuhan nggo dagangan juragan-juragan, nggo ampiran juragan-juragan desa liya, malah ana wong sabrangé. Muara kali Gung sing nggo pelabuhan wayah samana, ora liya muara sungai Gung mbang kulon, sing saiki arané Muaratua.
Nang Tegal muarané ana loro, anané muara loro mau bisabaé Tegal kuwé asal muasalé gundukan lemah atawa delta, sing diapit rong kali.
Wong Tegal sing asliné, ya nrima anané agama Islam nang Tegal, nanging kabudayaan asliné ya ora mandeg greg. Wayah samana kabudayan Tegal asliné campur aduk, ana Hindu ana Islam, kaya sintren, lais, wayang, balo-balo ,trebang Jawa, srakalan.
Sawisé Ki Gedé Sebayu séda, disarekna nang desa Danawarih, Kecamatan Balapulang, Kabupaten Tegal, kuburan Wangan Jimat. Pereké kuburané Ki Gede Sebayu, mbang sisih kuloné ana pancuran sing nggo pranti wudhu.
Rintisané Ki Gedé Sebayu diterusna daning anaké sing arané Ki Gedé Honggowono. Honggowono wektu séda. disarekna nang dukuh Karangampél Slawi, Kabupaten Tegal. Nang silsilahé wangsa Reksonegoro, Ki Gedé Sebayu anake Ki Ageng Ngunut, cucuné Batara Katong, Bupati Ponorogo.
TUTUPAN
Kota Tegal kuwé gemiyen arané desa Tetegal (Teteguall). Diragati Ki Gedé Sebayu desa kuwé mau selek sewu selek maju, majuné cepet nemen, nganti dadi kota. Kota Tegal tambah pentol toli moncér,
Ki Gedé Sebayu bisa majukna panguripé wong Tegal, sawahé tambah amba, ambané ora mupakat. Sawah kuwé mau ora mung amba, hasilé ya tambah mundung-mundung, tata tirtané apik.nemen, dadiné sawah sing amba mau keduman banyu kabéh, laka sing kapiran.
Sebayu pentolan pol olihé majukna Tegal, basa mentéréngè kuwé Sebayu pelopor pembangunan nang desa Tetegal. Saking pentolané, Sebayu dikukuhna dadi Juru Demung atawa Demang, sing ngukuhna Bupati Pamalang, wayah semana Bupatiné Radén Benowo.
Pungkasané, sing perlu diéling éling, mbangun kuwé kudu ana wawasan lingkunganné, ndasari Pancasila karo karepé Proklamasi Kemerdekaan Republik Indonesia 17 Agustus 1945,
kuwé mau kudu trep mantep nang jiwané masyarakat. Mbangun nggo cara kaya kuwé, kudu diopéni terus aja nganti pedhot,
nggo nggugah samangaté masyarakat éndah gandrung maring pembangunan nggo wujudna Tegal Kota Bahari : Bersih, Aman, Sehat, Rapi dan Ber Iman.
Tegal, fauzi
